Elmar Þór Gilbertsson er einn af þessum duglegu Dalamönnum sem er að gera það gott úti í hinum stóra heimi. Elmar Þór er borinn og barnfæddur Dalamaður en býr nú í Hollandi þar sem hann syngur í stærsta óperuhúsi Hollands, De Nederlandse Opera sem staðsett er í Amsterdam.

Þar hefur honum gengið vel og meðal annars verið ráðinn þar í uppfærslu árið 2015. Elmari hefur einnig verið boðið að taka þátt í einni af stærstu óperuhátíðum í Evrópu, það er til Aix-en-provance í Frakklandi.

Þar mun Elmar syngja töfraflautuna í júlí 2014. En þangað til segist Elmar hafa nóg að gera í smærri verkefnum í Hollandi og meðal annars í Maastricht.

Alþingismaðurinn og Dalabóndinn Ásmundur Einar Daðason er á þönum þessa dagana um norðvesturkjördæmi ásamt flokkssystkynum sínum í þeim tilgangi að hitta kjósendur. Með mikilli lægni náðum við að króa Ásmund af í stutta stund og taka hann tali.

Í viðtali okkar við Ásmund Einar segist hann meðal annars finna það á jafnöldrum sínum að það sé vilji til þess að búa í sveitum landsins og enginn sérstakur vilji sé til þess að búa á höfuðborgarsvæðinu.

Fólk þurfi hins vegar að hafa í sig og á og það verði að vera ákveðin grunnþjónusta á svæðunum bæði þegar kemur að skólum og menntun, fjarskiptum, samgöngum og öðru.  Ásmundur segist þess fullviss að skilningur manna sé að aukast á þessu.