Allt tiltækt lið björgunaraðila ì Dalabyggð var kallað út nú í morgun vegna umferðarslyss á sunnanverðri Bröttubrekku.

Samkvæmt fréttavef mbl.is voru tveir aðilar fluttir með sjúkrabifreiðum til Reykjavíkur.

Mikil ísing hefur skapast á Bröttubrekku og víðar í morgun og eru vegfarendur beðnir um að fara varlega af þeim sökum.

Slökkvilið Dalabyggðar var kallað um kl.21:50  í kvöld að bænum Sælingsdalstungu vegna elds sem þar logaði í dráttarvél.

Þegar slökkviliðið kom á staðinn var dráttarvélin alelda en um 20 km eru frá Búðardal að Sælingsdalstungu.  

Bóndi af öðrum bæ í Hvammssveit nýtir aðstöðu í fjárhúsunum í Sælingsdalstungu og var hann við gjafir þegar kviknaði í vélinn en hún mun hafa verið í gangi samkvæmt heimildarmanni Búðardalur.is.  

Dráttarvélin sem er nokkuð gömul stóð nálægt annari vél og mátti litlu muna að einnig hefði kviknað í henni en slökkvilið náði að koma í veg fyrir frekara tjón. 

Engan sakaði í brunanum en dráttarvélin er gjörónýt.

Slökkvilið Dalabyggðar var kallað nú fyrir stundu að bænum Blönduhlíð í Hörðudal vegna tilkynningar um eld.

Í ljós koma að eldurinn logaði í sumarhúsi sem stendur vestan við sjálft íbúðarhúsið. Að sögn heimildarmanns Búðardalur.is er búið að ráða niðurlögum eldsins en engin mun hafa verið í húsinu þegar eldurinn kom upp.

Ekki er vitað hversu mikið tjónið er eða hver eldsupptök voru. Þó mun slökkvilið hafa fjarlægt ísskáp út úr húsinu. Slökkvilið Dalabyggðar er enn á vettvangi þegar þetta er skrifað.

Björgunarsveitin Ósk í Dalabyggð var kölluð út í gærkvöldi um kl.21:00 vegna konu sem hafði lent í sjálfheldu á Hrístindahnúk fyrir ofan Fellsendaskóg í Miðdölum.

Samkvæmd Guðmundi Frey Geirssyni formanni Björgunarsveitarinnar Óskar hafði konan sem var ein á ferð, samband við vinkonu sína sem síðan hafði samband við Björgunarsveitina og óskaði vinkona konunnar eftir aðstoð björgunarsveitarinnar við að koma henni til byggða.

Aðstæður á vettvangi voru talsvert erfiðar að sögn Guðmundar en mjög bratt var þar sem konan lenti í sjálfheldunni fyrir utan það að komið var myrkur þegar þetta var.